Xulalka Goboladda Xaysimo Iyo Daad Madheedh oo Si Toos ah ugu Gudbay Wareega Labaad ee Tartanka Ciyaaraha Iyo Xamaasada Ciyaartii Maanta ee Togdheer Iyo Xaysimo DAAWO

Burco 12 Oct 2015  (SDN/QJ) -Xulalka Goboladda Togdheer iyo Xaysimo ayaa Galabta isku haleelay Ciyaar adag oo Ka Mid ah Tartanka Ciyaaraha Gobolada ee Ka socda Garoonak Alamse ee Magaalada Burco.

labada Xulba Waxay Garoonka la soo galeen qaab Ciyaareed ku dhisan Weerar iyo Weerar Celis iyadoo Xul waliba ku dadaalayey inay Guushu raacdo si uu u noqdo ka u Gudba Wareega 2aad ee Tartanka Ciyaaraha  ee lagu qabanayo Caasimada Hargaysa.

Xulka Gobolka Xaysimo ayaa hore u sitay 4 Dhibcood halka Xulka Gobolka Togdheer uu Hal dhibic watay Isla markaana rajadiisu ahayd inuu ugu yaraan laba Gool ku badiyo.

labada Xul ayaa soo bandhigay hanaan ciyaareed farsamadiisu sarayso, waxaana qaybtii hore ee Ciyaarta u suuro gashay Xulka Gobolka Togdheer ee Marti geliyey Tartanka Ciyaaraha ee Gobolada beri oo la yimid Goolkoodi Kowaad ee ay Ciyaarta ku hogaaminayeen.

Qaybtii labaad ee Ciyaarta markii la isugu soo noqday ayaa labada Xul Waxay garoonka kula soo laabteen qaab ciyaareed tayadiisu sarayso, Gunaanadkii Ciyaartaas ayaa ku soo dhamaatay Hal Gool oo ay Ku Guulaysatay Xulka Gobolka Togdheer.

Xulka Gobolka Xaysimo oo ay u ahayd Markii Kowaad ee ay ka soo qayb galaan Tartanka Ciyaaraha Gobolada  iyo Xulka Gobolka Daad Madheedh ayaa si toos ah ugu soo Gudbay Wareega labaad ee Tartanka Ciyaaraha Gobolada Somaliland oo Ka qabsoomi doona Caasimada dalka ee hargaysa.