Nuxurka Waraaq Sir ah iyo Hub Laxaad Leh Oo Xuutiyiintu Ka Heleen Safaaradda Sucuudigu Ku Lahaa Dalka Yemen
Sanca:June,02,2015(SDN/QJ)-Sida ay sheegayaan wararka ka imanaya Waddanka Yemen, waxa maleeshiyada Shiicada ahi ay gacanta ku dhigeen Hub iyo warqado sir ah oo ay ka heleen Safaaradda Sucuudigu ku lahaa Dalka yemen.
Warkan oo laga soo xigtay Wakaaladda wararka dalka Iraan ee ”Fars”ayaa waxa ay ku warantay in gudaha safaaradda Sucuudiga laga helay hub tiro badan oo laga soo dhoofiyay wadanka Israa’il oo lagu sameeyay.
Sidoo kale waxaa warkaasi daabacay qaar ka mid ah wargaysyada kasoo baxa Israaiil.
Xuutiyiinta ayaa sidoo kale sheegay in ay gacanta ku dhigeen qoraalo sir ah ku kaydsanaa gudaha safaaradda kuwaasi oo qaar ka mid ahi sheegayaan in maraykanku qorshaynayo saldhig inuu ka furan doono jasiirado yemen ka tirsan oo ku yaala koonfur galbeed dalkaasi.
Ma jiro war arrintaasi ku saabsan oo kasoo baxay dawladda Sucuudiga, waxana ay wali arrinta ku waddaa aamusnaan.
Sucuudiga ayaa ku dhawaad laba bilood dalka Yemen ka wada duqayn xagga cirka ah oo ay gaysanayaan diyaaradaha dagaalka xulafada carabta kadib markii ay xuutiyiintu la wareegeen xukunka dalkaasi.
SDN/QJ