Qarax Saaka Lala Eegtay Ciidamo Baadhitaanno Ka Waday Isgoys Ku Yaalla Muqdisho
Muqdisho:Mar,30,2015(SDN/QJ)-Wararka naga soo gaadhaya Magaalada Muqdisho, ayaa sheegay in saaka aroortii hore Bambo gacmeed lagu weeraray ciidamo nabad sugid ah oo ku sugnaa Isgoyska Dabka ee Gudaha magaaladaas.
Warku waxa uu intaas ku darayaa in qaraxaasi uu dhaawac gaadhsiiyey askar gaadiidka Baadhitaanno ku haysay oo aan tiradadooda la xaqiijin, waxana loo qaaday goobaha cisbitaallada.
Qaar ka mid ah dadka deegaanka ayaa sheegay in ragga qaraxa ku tuuray ciidamada ay saarnaayeen gaadhi yar, kadibna ay meesha ka baxsadeen, isla-markaana ciidamo gurmad ahaa oo halkaas yimi ku guuldarraysteen inay gacanta ku soo dhigaan.
Jugta qaraxa ayaa laga maqlay qaybo ka mid ah Magaalada Muqdisho, maadaama jawiga uu deganaa, sidaasina dhawaqa qaraxa xoogiisa lagu maqlay.
Qaraxa kadib ciidamada ammaanka ayaa soo qabtay ku dhawaad 10-ruux oo ciidamada ay uga shakiyeen inay wax ka og yihiin qaraxa lagu tuuray, inkastoo baabuurkii qaraxa laga soo tuuray uu goobta ka cararay.
Xoogaga Shabaab ayaa maalintii Jimcihii lasoo dhaafay waxa ay weerareen Hoteelka Maka Al-Mukarama ee Magaalada Muqdisho oo ay ku dileen 20-tameeyo ruux, waxana haatan kordhaysa Cabsida shacabka ee la xidhiidha ammaanka sii xumaanaya.
SDN/QJ