Sirdoonka Ingiriiska Oo La Wareegay Hadhaaga Jidhka Haweenaydii Dhawaan Isku Qarxisay Muqdisho
Muqdisho:Feb,25,2015(SDN/QJ)-Sirdoonka Dalka Somalia, ayaa wararku sheegayaan inay hadhaaga jidhka Haweenaydii dhawaan isku qarxisay Hutel Central ee Magaalada Muqdisho ku wareejisay Sirdoonka Waddaka Britain si loogu sameeyo baadhitaanno dheeri ah.
Madaxii haweeneydan oo kaamil ah ayaa ku dhacay hotelka kale ee Naasahablood II kaasoo ku dhegan hotelka qaraxu ka dhacay ee Central, waxaana la wareegay sirdoonka Soomaaliya, kadibna waxay u wareejiyeen saraakiil ka socota Ingiriiska oo saldhigoodu yahay Safaaradda Ingiriiska ee ku dhex taalla garoonka diyaaradaha Muqdisho, aagga Xalane iyadoo baadhitaano ku sameyn doona si loo xaqiijiyo shaqsiyadeeda.
Haweeneydan ayaa ahayd qof ka timid dalka Holland oo sharci ay ka heysatay, waxaana ay hooyo u ahayd lix caruur ah oo min laba-laba mataane u ahaa sida uu sheegay wasiirka amniga dowladda Soomaaliya, waxaana la xidhay dhammaan shaqaalihii kale iyo maamulkii hotelka Central.
Waxaa shalay Muqdisho gaadhay Safiirka Holland u qaabilsan Soomaaliya Joost Reintjes iyo saraakiil la socota oo la sheegay inay iyaguna doonayaan ku lug lahaanshaha baadhitaanka haweeneyda isku qarxisay hotelka Central, waxayna sida la sheegay dalbadeen inay ka qeyb qaataan baadhitaanka kiiska iyo macluumaadka haweeneyda is qarxisay.
Qaraxyadii mataanaha ahaa ee 20-kii Bishan ka dhacay Muqdisho ayaa ahaa kuwii ugu qasaaraha badnaa in muddo ah oo sida qorsheeyayna ay waqti dheer qaadatay, waxana ay Bannaanka keeneen heerka ay gaadhsiisan tahay awoodda sirdoonka iyo qarax abaabulka Alshabaab.
Sirdoonka Ingiriiska ayaa la aaminsan yahay inay rugo kala duwan ku leeyihiin Gudaha Magaalada Muqdisho, gaar ahaan Xerada Xalane ee Ciidanka Amisom deggen yihiin, waxana la filayaa inay haatan halkaas kusoo baadhi doonaan hadhaaga jidhka haweenaydaas.
SDN/QJ