Tixgaaban oo aan ugu baroor diiqayo Geesigii Muj. Abdilaahi Abdi aw Hirsi ( Abdillahi Xero AHN)

Haddii gole rag uu soo goglo oo gar lagu qaado
ama guluf colaadeed dagaal lagu gorfaynaayo
ama nabad la gaadhiyo samaan la is gudoonsiyo…
ama hadal gobeed iyo murti la is garwaaqsiyo
wuxuu hadalku soo gaabin jiray gees ma dhaafta ah e
geeridii Xeray sheegayeen galabba waa ruuxe
goblatadan adduunyaad ileen geedibaan nahay
waa la is guraayuun ilaa adam gelinkiise
guri waa ka aakhiro ninkii gama u jeedow.
aan gorfeeyo wuxuu libin guntaday geesigaa baxay
Goolaaftankii xeeleedeed goosan la caraabka
Sahanku ku gaylaamin jiray goobo laga waashay.
Siduu gaadhka uga meerijiray galaw la’aantiisa
Guuraha habeenkii wuxuu gama uu diido
guubabo iyo geesimo geeshka kula meero
Tii oo ka gees iyo gees garabsin loo yeeley
oo qaar jid goon sii galiyo lug iyo gaadiidle
sida aar horwayn gelelefay goor la wadda jiifo
gudguduudka waabari muxuu guuto fara saaray
gurmad werer iyo gaadmo iyo guluf ku soo foodle
in taba wuu galaabixin ogaa goobta dirireede
ma gabade libaaxu ahaa geesi caanbaxaye
Gala galada guuluhu ku helay wa galaalaxa e
goobjoog raggii soo ahaa saw ma garanaayo
Cabdi yusuf markii laysku galay galabtii lays eeday
ee goosan iyo goosan dhacay geli dagaalkiiye
gacamadda raggii soo gurtiyo gebi la naafeeye
miyaan Moorgan goojadda sidii koran dhibiilaynin
Eebana gargaarkii u fidin goobta niman joogay
Abaanduulka guuleed Xeraa guule ku ogaaye
Koodbuurba isagaaw guntadday guridhigiisiye
geediga markaan ugu baxnay guutadda afraad
iyo garabsigi aw sancaan iyo boqol galbeedkaasa
iyo goosankii bariga eenaga gadaaleyey
Gadhka yogolka waatii dharaar loo gudoonsaday
guulwade colkay ula baxeen meeshaa lagu gaabi
darfaclena wixii gaadhay iyo labadii gooroodba
gala galada waa tuulaa geesigaa baxay
xadhig xadhigna goolaftankii wiiga lays galay
sow goaamadiisii mayahayn kuway guusha nagu raacday
ilaa guda galkii saw halyeeygu naguma geeraarin
inuu geesi baxay uu ahaa saw ma garanayno
Geyigeena oo idilba way gaadhay libintiiye
Gardaro iyo xumaandiid muxuu guluf u hansaystay
Gaajo iyo haraadkaba muxuu goowska ka adkaystay.
Maxaa fule gariiriyo dhabcaal libintii gaadaystay
Maxaa kuu garayskii ka rogay gooni u baanay
Gujo iyo maxay ugu dareen geestaa uga leexo
Alla maxaan nimaan gole la tegin galaw ku suureeyey.
isna garashadiisii muxuu hadalka soo gaabshay
Cabdillahi ruux garanayaa iyo maqal nimuu gaadhay
Gidigood naxdirin way u timi geeridii Xero e
Gelbis weeye dunidani iyo mid aan guul ku siinahaye
waa guriga aakhiro rugtaan lagaba guurayne
Isagoo werdiga guraya baa guule oofsaday
galad eebe weeyan halku galabta joogaaye
gurigii jannadda iyo nimcuu gacan togaalayne.
Geesigana Illaahay ma xilo goob u joogabe
godka lagu janeeyaw eebahay gogosha kuu nuur.