Gudoomiyihii Gudida Baadhista Xasuuqa oo Ku Dhaawacmay Shil Baabuur iyo Haweenay ku Geeriyootay

Hargaysa 24.Feb 2015 (SDN/QJ)- Alle ha u naxariistee hal qof ayaa ku dhintay Sadex kalena waxaa ka soo gaadhay dhaawac kadib markii Maanta shil ka dhashay laba gaadhi oo is jiidhay uu ka dhacay inta u dhaxaysa Haleeya iyo Dacar budhuq.
Shilkan waxaa ku naf waayay Marxuumad Canab Yuusuf Dhakhtar, halka Sadexda qof ee Ku dhaawacmay uu ka mid yahay Gudoomiyihii Gudida Baadhista Xasuuqa Khadar Axmed Like.
Warku waxa uu sheegayaa in Shilkani ka dhashay kadib markii ay isku dhaceen laba gaadhi oo Noocyadoodu kala ahaayeen Land Curser iyo Noha .
Gudoomiyaha Gudida baadhista Xasuuqa Khadar Axmed Like oo ku dhaawacmay Shilkan Isla markaana ahaa Wadihii Gaadhiga land Curer ka ah ee Marxuumadu ku dhimatay ayaa noo sheegay in baaburka Noh-du uu xaga dabe ka soo galay gaadhigooda taasina ay sababtay inuu sadex jeer gaadhigu isla rogrogo.
Maamulaha Cisbitaalka Guud ee Caasimada Hargaysa Axmed Daahir Aadan ayaa dhankiisa waxa uu sheegay in dadka dhaawac ah xaaladoodu ay wanaagsan tahay.
Dhanka kale Taliyaha Ciidanka Nabadgalyada Wadooyinka Faysal Xiis ayaa noo sheegay inay baadhayaan Sababta keentay Shilkan.
Shilalka ka dhaca Jidka Xidhiidhiya Caasimada Hargaysa iyo Berbera ayaa la aaminsan yahay in inta badan ay Sababaan Xawaaraha baabuurtu ku socdaan iyo taxadir la’aanta darawaliinta qaarkood.