Madaxweynaha Somalia oo Mar kale Xilka Jagada Raysal Wasaare u Magacaabay C.rashiid Cali Sharmaarke

Muqdisho 17.Dec 2014 (SDN/QJ)- Madaxweynaha Soomaaliya ayaa magacaabay raysul wasaare cusub – midkii saddexaad oo ay yeelato Soomaaliya muddo labo sano ah.

Cumar Cabdirashiid Cali ayaa loogu magacaabay xilka raysul wasaaraha shir jaraa’id oo galabta oo Arbaco ah lagu qabtay xarunta madaxtooyada Soomaliya ee Villa Soomaaliya.

Magacaabista Cumar ayaa imaaneysa kaddib markii raysul wasaarihii hore, Cabdiweli Sheekh Axmed, uu lumiyay kalsoonida baarlamaanka kaddib markii khilaaf uu soo kala dhex galay asaga iyo madaxweyne Xasan Sheekh.

Cumar, danjiraha haatan Soomaaliya u fadhiya dalka Mareykanka, ayaa sidoo kale raysul wasaare ka soo noqday dowladdii KMG ahayd ee uu madaxweynaha ka ahaa Sheekh Shariif Sheekh Axmed.

Wuxuu haystaa 30 maalmood si uu soo magacaabo gole wasiirro oo cusub, kaas oo la hor-geyn doono baarlamaanka si loo ansixiyo.

Cumar ayaa noqonaya raysul wasaarihii toddobaad ee Soomaaliya ay yeelato toddobadii sano ee ugu dambeysay.

Muqdisho SDN/QJ