Tifaftirihii Guud ee Telefishanka HCTV oo is casilay, qoraalna ku faahfaahiyay duruufaha ku kelifay

Hargeysa 2, November 2014 (SDN)- Tifaftirihii guud ee Telefishanka Horn Cable TV (HCTV) Mr. Cabdillaahi Aaden Cumar (Wayab), ayaa sheegay inuu iska casilay xilkii tifaftirka telefishankaas oo uu in muddo ah hayay.

Mr. Wayab oo xalay qoraal kasoo saaray Hargeysa, wuxuu ka hadlay sababaha dhaliyay inuu shaqada ka tago, taasoo uu ku xidhiidhiyay mulkiilaha HCTV Mr. Farxaan Xaaji Cali, wuxuuna qoraalkaasi u dhignaa sidan; “Anigoo ah Cabdillaahi Aadan Cumar [Wayab] waxan iskay u go’aansaday inaan istiqaalad rasmi ah ka dhiibo shaqadii  u  hayey Horn Cable TV oo ahayd Tifaftiraha Guud, kadib markuu Mulkiilaha HCTV  igu ixtiraami waayey hawshii iyo mas’uuliyaddii uu ii dhiibay,taasoo markaan weydiiyeyna uu iigu jawaaaybay aflagaado aanan gayin.

Waxa dhacday in anigoo jooga oo ku sugan goobta shaqada aan ku war helo warar aan  isoo marin oo ka baxa Tva, markaan su’aalo Madaxa Wararkuna oo ii sheego inay tahay amarka Mulkiilaha. Arrintan markaan weydiiyey Mulkiilaha sababta uu anigoo ah Tifaftiraha iila socodsiin waayey, xataa si aan uga jawaabo haddii wax layga weydiiyo, waxa uu iigu jawaabo erayo aanan doonayn inaan halkan ku muujiyo balse ahaa kuwa aad u qallafsanaa oo aan sinaba ii qaban, isla markaana ku fiicnayn in loogu jawaabo qof shaqo idinka dhaxayso.

Haddaba,  anigoo ogsoon inaan ahay  qofka  kowaad ee leh masuuliyada  wax kasta oo  ka baxa TV ga xumaan iyo samaanba waxay ila noqon weyday inaan sidaa kusii dhex fadhiyo HCTV  oo aan ku sugo in la ii xidho ama dhibaato kale iga soo gaadho waxanan war iyo wacaal midna u ahayn, sidaaa awgeed ayaan maanta oo ah 1da Nov,2014 go’aansaday inaan istiqaalad ka dhiibo xilkii iyo shaqadii aan u hayey Horn Cable.”

Qurbejoog.com,

Hargeysa