Sirdoonka Somalia Oo Baadi Goobaya Gaadhi Waraaqo Digniin ah Ku Daadiyey Badhtamaha Muqdisho
Muqdisho:Aug,29,2014(SDN/QJ)-Ciidanka sirdoonka G obolka Banaadir, ayaa Gaadhi Badhtamaha Magaalada ku daadiyey Waraaqo Digniin ah.
Gaadhiga la raadinayo oo Nooca raaxada ah ayaa la sheegayaa inay Waraaqahan ku daadiyey Degmooyinka Hodan iyo Waaberi ee Magaalada Muqdisho, waxana la sheegayaa in xogtiisa ay bixiyeen shacabkii arkayey.
Waraaqaha, ayaa waxaa ku qornaa ereyo ka dhan ah dumarka ku dhaqan Magaalada Muqdisho, ee qaata dharka qafiifka ah, waxaana loogu yeedhay inay qaataan jalbaabka (Xijaabka).
Dumarka ku dhaqan Caasimada waxaa looga digay in tallaabo adag laga qaadi doono, haddii aanay waxba ka bedelan dharka muujinaaya cawradooda, kolka ay dhex marayaan Magaalada amaba ay la socdaan gaadiidka dadweynaha.
Sarkaal ka tirsan Hay’adda Nabad Suggida oo diiday in magaciisa Warbaahinta loo adeegsado, ayaa sheegaaya inay xogta ku hayaan in gaadhi nooca raaxada ah, loo adeegsaday waraaqihii lagu daadiyay Degmooyinka Wadajir iyo Hodan.
Sarkaalkan ayaa intaa ku daray inay soconayaan dadaalo ay ku doonayaan inay ku soo qabtaan gaadhigan iyo cidii ka dambeysayba, in waraaqaha ay ku daadiso qaybo ka mid ah Caasimada.
Si sax ah looma garanaayo cidda dhabta ah ee ka dambeysay digniinaha loo jeedinaayo haweenka ku nool Magaalada Muqdisho.
Waraaqahan ayaa warwar gaar ah ku abuuray shacabka Muqdisho, waxana haweenka wajiyadooda laga dhex dheehan karayey inay Baqdin badan ka qabaan Cidda waraaqahan iyaga loogu digayo ku daadisay Magaalada Dhexdeeda.
SDN/QJ
Contact@somalidiasporanews.com