Prof Axmed I.Samatar oo Xukuumada Madaxweyne Siilaanyo ku Dhaliilay inay Fulin Weyday Dardaarankii Marxuun Maxamed Saleebaan Tubeec
Ottawa 25.March 2014 (SDN)-Prof. Axmed Ismaaciil Samatar ayaa shaaciyey dariiq cusub oo loo mari karo ictiraafka Somaliland, kaasoo sheegay in marka hore adduunka loo sharaxo sababaha ay Somaliland aqoonsiga u doonayso.
Prof. Axmed Ismaaciil Samatar waxa uu sheegay inaanay Somaliland aqoonsi caalamiya helin wakhti ku siman 23-sanadood, waxaanu tilmaamay dariiq cusub oo looga wareegi karo Ictiraaf raadinta Somaliland,waxaanu yidhi“Waa in adduunka laga dhaadhiciyo sababaha ay Somaliland u dooneyso aqoonsi, isla markaasna loo qoon deeyaa Miisaanayd aan ka yareyn $10-million sannadkiiba taas oo gaar ah ololaha gooni isutaaga Somaliland,sidoo kalana la helo dad aqoon iyo xirfadba u leh in ay gaadh-siiyaan Shaqsiyaadka iyo dowladaha ku habboon sababaha ay Somaliland u dooneyso aqoonsi
Prof Samatar oo hadalkiisii sii wada ayaa waxaa uu tibaaxay in Somaliland ay heshay Muftaaxii dowladnimo gaadhayna Siyaasad deggen, Dimoqaraadiyad iyo dhismaha kaabayaashii Dhaqaalaha oo dhammaystiran.
Prof. Samatar ayaa wuxuu ka digay in aan Somaliland noqonin meel xukunku gacanta u galo koox gaar ah ama qabiil gooni ah, wuxuuna ku baaqay in sida kaliya ee ay Somaliland horumar ku gaadh kartaa uu yahay wada-jirka iyo ka wada qayb-galka Maamulka dowladnimo.
Mar uu Prof. Samatar ka hadlayey dhibaatada uu Qaadku ku hayo Somaliland, ayuu sheegay in badeeco dhan ilaa $450 million ay dowladda Itoobiya u soo dhoofiso Somaliland, ilaa $300 million oo ka mid ah badeecaddaas ay ku baxdaa jaadka laga cuno Somaliland; arrintaas uu Samatar ku tilmaamay dhiig-bax dhaqaale, wuxuuna ku taliyey in la yareeyo qayilaadda si dhaqaalaha ku baxa Qaadka loogu leexiyo dhismaha Somaliland.
Ugu dambeyntii wuxuu Prof. Samatar halkaa ku xusay alle ha u naxariistee fannaankii Maxamed Saleebaan Tubeec, isagoo sheegay sida uu uga xun yahay inaan Somaliland fulin dardaarankii Marxuum Maxamed Saleeban oo ahaa in lagu Aaso magaalada Berbera.
“Sababta ugu weyn ee Maydka Marxuum Maxamed Saleebaan loogu aasay Xamar ay ahayd gurmadkii dhaqaale ee Xamar looga fidiyey intuu uu marxuumku ku bukay dalka Jarmalka, iyada oo aanay Somaliland xilba iska saarin daryeelkiisa Caafimaad”.Ayuu yidhi Prof. Axmed Ismaaciil Samatar.
Prof. Axmed Ismaaciil Samatar oo 22-kii bishan ka qayb-galay kulan ay soo qaban-qaabiyeen Jaaliyadda reer Somaliland ee ku nool Magaalad Ottawa dalka Canada, iyadoo uu kulankaas goob-joog ka ahaa Guddoomiye ku-xigeenka 1aad ee Golaha Wakiillada Somaliland Baashe Maxamed Faarax oo ka waramay Warbixin ku saabsan Xaaladda guud ee Somaliland.
Ottawa SDN.
Qurbejoog.com