Machad hab Online ah ku bixinaya duruusta Quraanka Kariimka ah oo bushaaro u haya Qurbejoogta Soomaalida iyo kuwa kale ee waxbarashada danaynaya
Hargeysa Dec, 8, 2013 (SDN)- Machadka Caalamul-Quraan ayaa daahfuray hab casri ah oo uu ku bixinayo duruusta barashada Quraanka Kariimka ah, taasoo ah fursad dadweynaha Soomaaliyeed siinaysa inay si fudud hab online ah ugu soo xidhmaan dugsigaas.
Dugsiga oo xaruntiisu tahay magaalada Hargeysa, waxa uu u shaqaynayaa hab Soomaalidu meel kasta oo ay joogto u saamaxaya inay ku soo xidhmi karaan, isla markaana ay hab online ah barashada Quraanka Kariimka, aqoonta diinta Islaamka iyo koorsooyin kaleba ku qaadan karaan, sida lagu sheegay wargelin uu maamulka dugsigu ka soosaaray magaalada Hargeysa.
Sidoo kale, dugsigu waxa uu wargelintaas uu dadweynaha ku socodsiiyay ku sheegay in arrintani muhiimad gaara u leedahay dadka Soomaalida ah ee ku nool dalalka dibadda, gaar ahaan kuwa aan gaadhi karin ama aanu waqtigoodu u saamaxaynin inay tagaan ama ay helaan goobo Quraanka iyo duruusta dhinaca diinta Islaamka lagu barto.
Dugsiga oo ah kii u horeeyay noociisa ee laga furo dalka, waxay wargelinta uu soosaaray u dhignayd sidan; “Caalamulquraan waa Shabakad aad ka baran karto cilmiga diinta adiga oo jooga gurigaaga, xafiiskaaga, waxna ka dhigan karo caruur iyo waayeelba. Machadkan Caalamul Quraan waxa uu ka ka hawlgalaa guud ahaanba Caalamka oo dhan, gaar ahaan meel kasta oo ay joogaan ama ku nool yihiin Soomaalidu, waxaananu diyaar u nahay in caruurta, dadka waawayn iyo dhalinyarada aanu ku barno meel kasta oo ay joogaan oo ah Online.
Haddaba, waxaanu u sheegaynaa in dadka Soomaaliyeed ee jooga Qurbaha, una baahan inay wax ka bartaan macluumaadka ku aadan Diinta, Axaadiiska, Quraanka iyo Sunada Rasuulka ay ku baro doonaan si online ah (Maqal iyo Muuqaal ah) oo lagu baranayo Quraanka kariimka ah, barashada luuqada Carabiga iyo higaada, barashada axaadiista Nabiga. Waxa wax ka dhigaya mahcadka Macalimiin Soomaali ah oo aqoon buuxda u leh diinta Islaamka iyo casharada ay bixinayaan.
Hadaad rabto in aad is qorto Machadka ama aad tijaabisid waxaad u baahantahay: – Computer – Internet – Microphone ama sameecad -. marka aad soo diyaar-garoowdo fadlan kala soo xiriir Tilifoonada hoos ku qoran.
Free linka: Free Call:0012183667105
Telefoon 00252634121553
Skype: caalamul.quraan
Emailka caalamulquraan@hotmail.com
Facebook: caalamulquraan
Website: caalamulquraan.com.”
Qurbejoog.com, Hargeysa