6 Qof oo ku dhimatay, iyo 20 ku dhaawacantay dagaal Maanta ka dhacay duleedka Xuddur

Xuddur 13.Aug (SDN) Lix qof ayaa ku geeriyootay, 20 kalena waa ay ku dhaawacmeen dagaal maanta ka dhacay deegaanka Garasweyne oo 50 km waqooyi galbeed ka xiga degmada Xuddur ee xarunta gobolka Bakool.

Dagaalka ayaa dhex maray ciidamada dowladda federaalka iyo maleeshiyo ka tirsan al-Shabaab oo ku sugneyd deegaanka, waxaana dadka dhintay iyo kuwa dhaawacmay ay isugu jiraan dad rayid ah iyo dhinacyadii dagaalllaamay.

Guddoomiyaha gobolka Bakool Maxamed Cabdi Tall oo la hadlay Bar-kulan ayaa sheegay in dagaalka ay qaadeen ciidamadooda, ayna muddo haysteen deegaanka uu dagaalku ka dhacay.

Maxamed Tall ayaa wacad ku maray in ay weerarro kale ku qaadi doonaan goobaha ay maleeshiyada al-Shabaab kaga sugantahay gobolka Bakool.

Xaaladda ayaa ah mid kacsan, waxaana deegaanka Garasweyne uu iminka yahay mid haawanaya oo aanay cidna gacanta ku haynin, maadama ay dib uga soo ruqaansadeen ciidanka dowladda.

Xuddur SDN.

Qurbejoog.com