The Sun: Real Madrid Oo Dalab Ku Kacaya 110 Milyan Euros Ku Dalbaneysa Gareth Bale.

 

London: 12-Aug-2013:Wargeyska Ingariiska ka soo baxa ee The Sun oo shalay qoray in Tottenham ay soo diiday dalab 93.1 milyan euro oo Real Madrid ay ka soo gudbisay Gareth Bale, ayaa hadana maanta qoraya in Madrid ay isku diyaarineyso inay dalab kale oo labaad la soo laabato kaasoo ku kacaya 95 milyan ginni oo u dhiganta 110 milyan euros.

 

Waxaana jariirada The Sun ay leedahay inay kooxda reer Spain ay bixin doonto 59 milyan euro (51 milyan ginni) oo kaash ah oo ay la socdaan Angel Di Maria oo lagu qiimeeyo 29 milyan euros (25 milyan ginni)  iyo Fabio Coentrao oo lagu qiimeeyo 22 milyan euros (19 milyan ginni), iyagoo dalabkaan ku tilmaamay midkii qarniga.

 

Real ayaa laga soo diiday sida isla wargeyska uu shalay qoray heshiis rikoorka suuqa kala iibsiga jabin lahaa oo ah 81 milyan ginni oo u dhiganta 93.1 milyan euros oo ay ku doonayeen Bale.

 

Laakiin madaxweynaha Real Madrid Florentino Perez ayaa waxaa ka go’an inuu Bale ka dhigo saxiixiisii ugu danbeeyay ee Galactico ah.

 

Waxaana haddii dalabkaan ay sheegeyso The Sun uu yahay xaqiiq ay cadaadis saari doontaa gudoomiyaha Tottenham Daniel Levy kaasoo ilaa iyo haatan ku adkeysanaya in ciyaaryahanka uusan iib aheyn.

 

Bale ayaana u sheegay Levy inuu jeclaan lahaa inuu ku biiro Real Madrid.

 

Laakiin ciyaaryahanka garabka ka ciyaara oo 24 jir ah ayaa ka caga jiidaya inuu codsi qoran oo lagu iibinayo gudbiyo ama inuu qasbado in la iibiyo.