Puntland oo Dib u celisay Markab Turkey oo siday Raashin ay ku Sheegeen Mid Siyaasadeysan

Garowe 10.Aug (SDN) Waxaa xeebta Dekedda Bossaso soo gaaray Markab sida raashin mucaawino lagu sheegay oo laga soo diray magaalada Muqdisho laguna soo hagaajiyey Degmooyin  gaar ah oo ka tirsan gobollada Dowladda Puntland, kaasoo aan Dowladda Puntland  wax xiriir ah lagala soo samayn habayaraatee.

Qaabka sharci-daradda ah ee raashinkaan lagu soo diray iyo baalmarista Dowladda Puntland waa mid xadgudub ku ah Dowladda Puntland iyo shuruucda dalka.

Arrintaan waxay Dowladda Puntland u magacawday Guddi Wasiiro ah inuu daraasad ka sameeyo go’aan-na ka gaaro. Guddigu markuu arkay Dukumentiga la socda  Markabkaas, markuu daraasadeeyey qaabka raashinka loo soo abaabulay soo  diristiisii, markuu xaqiiqsaday ula jeedooyinka iyo danaha siyaasadeed ee looga  danlahaa, markuu Guddigu qiimeeyey in Dowladda Federaalka aysan wax codsi ama  xiriir ah kala soo samayn Dowladda Puntland, wuxuu Guddigu go’aan ku gaaray in  Markabkaas iyo raashinka uu sido dib loogu cesho meeshuu ka yimid.

Waxaa caddaatay in raashinkaani uu qeyb ka yahay siyaasad jahwareersan oo  Dowladda Federaalka ay ka wado gudaha Soomaaliya, taasoo khilaafsan Dastuurka  Federaalka KMG ah ee Soomaaliya iyo jiritaanka iyo Dastuurka Puntland.

Guddigu waxay aad uga xun yihiin Qoraaladda khaldan isna burinaaya ee ka soo  baxay Xafiiska Hay’adda Bisha Cas ee Turkiga oo fadhigeedu yahay Muqdisho,  Hey’adaasoo qoraal ku wargelisay Wasaaradda Arrimaha Gudaha ee Dowladda Federaalka inay sugto amaanka raashin lagu qeybiyo gudaha Puntland.

Dowladda Puntland waxay qoraal gaar ah u diraysaa Xafiiska Hay’adda Bisha Cas  ee Turkiga iyo Dowladda Turkiga si jawaab kaafi ah looga soo bixiyo xadgudubkaan  siyaasadeed oo ay Turkiga qeyb ka noqdeen.

Guddiga Wasiirada Puntland:

1. Wasiirka Amniga
2. Wasiirka Maaliyadda
3. Wasiirka Arrimaha Gudaha iyo Dowladaha Hoose
4. Wasiirka Dekedaha iyo Gadiidka Badda
5. Wasiirka Warfaafinta iyo Isgaarsiinta

Garowe SDN.

Qurbejoog.com