30 ka mid ahaa Kooxda Al Shabaab oo lagu dilay Mudug

Xaradheere December 07, 2023 Ciidamada Xoogga dalka Soomaaliyeed ayaa howlgal qorsheysan waxa ay ka sameeyeen xaafado ka tirsan degmada Baraag Gurguurte oo ka mid ah degmooyinka Xarardheere. Howlgalka ayaa lagu dilay in ka badan 30 xubnood oo ka tirsan Al-Shabaab, kuwaasi oo deganaa dhanka koonfureed kaga beegan magaalada Xarardheere ee gobolka Mudug.

Howlgalka ayaa lagu beegsaday xero Al-shabaab ay ku leeyihiin deegaanka Baraag Gurguurte, waxaana la sheegay in maleeshiyada ay isku duba rideen dhaq dhaqaaqyo halkaasi laga abaabulayay. Howlgalladan ayaa ka dambeeyay kadib markii maalmihii la soo dhaafay ay qalalaaso ka jireen deegaanada Dumaaye iyo Dabagaale ee koonfurta gobolka Mudug.

Degmooyin iyo gobollo kala duwan oo ay ka mid yihiin Mudug, Galgaduud, iyo Hiiraan ayaa waxaa si aad ah looga dareemay howlgallada ka dhanka ah Al-Shabaab, iyadoo howlgallada ay iska kaashanayaan ciidamada dowladda iyo maleeshiyaad deegaanka ah oo doonaya in ay ka hortagaan dhaq dhaqaaqyada kooxdaasi. Howlgalladan ugu dambeeyay ayaa qeyb ka ah istaraatiijiyad ballaaran oo lagu ciribtirayo khatarta Al-Shabaab ee gobolladan