3 Qof oo ku Naf waayay dagaal al-Shabaab iyo ciidanka dowladda ku dhex maray gobolka Baay

Gobolka Bay 15.Sep 2013 (SDN)- Saddex qof ayaa ku dhimatay, tiro kalena waa ay ku dhaawacantay dagaal u dhaxeeyey ciidamada dowladda iyo maleshiyada al-Shabaab oo xalay ka dhacay deegaanka Dambal oo ka tirsan degmada Aw-diinle ee gobolka Baay.

Guddoomiyaha degmada Aw-diinle, Maxamed Sheekh Cabdullaahi ayaa Bar-kulan u sheegay in dagaalku yimid markii al-Shabaab ay weerar ku soo qaadday ciidamo ka tirsan kuwa dowladda oo ku sugnaa deegaanka Dambal.

Guddoomiyaha ayaa intaas ku daray in dagaalka aysan waxyeello ka soo gaarin shacabka deegaanka, khasaaruhuna ka kooban yahay dhinacyada dagaallamay, ayna ciidamada dowladdu wali ku sugan yihiin goobta dagaalku ka dhacay.

Ciidamada dowladda ayaa howlgallo lagu adkaynayo nabadgalyada galinkii dambe ee shalay ka fuliyay deegaanno hoos yimaada degmada Aw-diinle.

Gobolka Bay SDN,

Qurbejoog.com